ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានជំរុញឱ្យរៀបចំយុទ្ធសាស្ត្រទេសចរណ៍វ៉ាក់សាំង ដែលអនុញ្ញាតឱ្យអ្នកទេសចរដែលបានចាក់វ៉ាក់សាំងរួច ចូលមកលេងក្នុងប្រទេសកម្ពុជាឡើងវិញបាន។
សម្ដេចតេជោ ហ៊ុន សែន មានប្រសាសន៍នៅព្រឹកនេះថា យុទ្ធសាស្ត្រនេះគឺអនុញ្ញាតឱ្យអ្នកទេសចរដែលចាក់វ៉ាក់សាំងគ្រប់ដូសរួច ចូលមកកម្ពុជាដោយឱ្យធ្វើចត្តាឡីស័កតែ៧ថ្ងៃប៉ុណ្ណោះ ហើយក្នុងរយៈពេល៧ថ្ងៃនេះទៀតសោត គឺអាចធ្វើដំណើរក្នុងខេត្តដែលខ្លួនបានទៅដោយសេរី។
សម្ដេចតេជោមានប្រសាសន៍ថា៖ « ឧទាហរណ៍នៅក្នុងសៀមរាប គឺយើងមិនឱ្យធ្វើចត្តាឡីស័កនៅក្នុងអូតែលសៀមរាបទេ។ យើងអនុញ្ញាតឱ្យគាត់ធ្វើចត្តាឡីស័កនៅក្នុងក្របខណ្ឌខេត្តហ្នឹង តំបន់ហ្នឹង យើងគូសជាតំបន់មួយទៅ។ អញ្ចឹងចត្តាឡីស័កមែន! តែគាត់អាចមើលប្រាង្គប្រាសាទបាន នៅខេត្តព្រះសីហនុក៏ដូចគ្នា ពេលមកដល់ឱ្យគាត់ធ្វើចត្តាឡីស័កតែគាត់អាចទៅងូតទឹកសមុទ្រ គាត់អាចទៅលេងកោះ ទៅលេងអីបាន។ លេងក្បួននេះមើល » ។
ក្នុងឱកាសនោះផងដែរ រដ្ឋមន្ត្រីសេដ្ឋកិច្ចលោក អូន ព័ន្ធមុនីរ័ត្ន ក៏បានប្រាប់ទៅកាន់ សម្ដេចតេជោ ថាយុទ្ធនេះកំពុងត្រូវបានរៀបចំ។
សម្ដេចក៏បានបន្ថែមទៀត ដោយជំរុញដល់អ្នកនាំភ្ញៀវទេសចរណ៍ទាំងអស់ចាក់វ៉ាក់សាំងឱ្យបានគ្រប់គ្នាដើម្បីជៀសវាងនូវ ការរើសអើងនៅពេលដែល ទេសចរណ៍វ៉ាក់សាំង ត្រូវបានបើក។
កាលពីម្សិលមិញ រដ្ឋមន្ត្រីទេសចរណ៍ លោក ថោង ខុន បានជំរុញដល់អាជីវកម្មទេសចរណ៍ ត្រៀមចាប់ផ្ដើមរៀបចំអាជីវកម្មខ្លួនឡើងវិញ សម្រាប់ទេសចរណ៍ក្នុងស្រុកក្នុងអំឡុងពិធីបុណ្យភ្ជុំបិណ្ឌខាងមុខ ដោយត្រូវអនុវត្តតាមស្ដង់ដារសុវត្ថិភាពដែលកំណត់ដោយរដ្ឋាភិបាល៕
